жиғилдон қайнашига қарши...

ЎТ ДАМЛАМАЛАР – ЖИҒИЛДОН ҚАЙНАШИГА ҚАРШИ

1-РЕЦЕПТ:

1 ош қошиқдан қуритилган мойчечак (ромашка), баргизуб, зуптурум (подорожник), қизилпойча (зверобой)ларни яхшилаб аралаштиринг ва стаканга солиб, устидан қайноқ сув қуйинг ва 2-3 соатга бостириб қўйинг. Дамлама тайёр бўлгач, овқатдан 30 дақиқа олдин қабул қилинг.

2-РЕЦЕПТ:

1 чой қошиқ қуритилган ялпиз (мята)ни стаканга солинг ва устидан қайноқ сув қуйиб, тўлдиринг. Дамламани зарда қайнаб бошлаган вақтда ичсангиз, ундан қутиласиз.

3-РЕЦЕПТ:

Тенг миқдорда қизилпойча (зверобой), ялпиз (мята) дасторбош, бўйимодарон (тысячелистник) ни сирли идишга солиб, устидан 1 литр қайноқ сув қуйинг ва 2-3 соатга бостириб қўйинг. Дамлама тайёр бўлгач, ундан кунига 3-5 маҳал, 0,5 стакандан ичинг.

4-РЕЦЕПТ:

Бир чимдимдан шивит (укроп) ва арпабодиён уруғини стаканга солинг ва устидан қайноқ сув қуйиб, бостириб қўйинг. Дамлама тайёр бўлгач, уни зарда қайнаб бошлаши билан ичинг. жиғилдон қайнаши тўхтамагунча 1 ҳўпламдан ичинг. Бундан ташқари, арпабодиён чойини 5-6 ҳафта давомида, кунига 2-3 маҳал, 1 стакандан ичиб турсангиз, жиғилдон қайнашидан қутиласиз.

5-РЕЦЕПТ:

Бир ҳовуч арпа ёки тариқни оғзингизга солиб, майдалаб чайнанг. Бунинг натижасида оғзингизда пайдо бўлган сўлакни ютинг. 6-7 дақиқада жиғилдон қайнаши енгилади. Бу усулдан жиғилдон қайнаши бошланиши билан фойдаланишингиз мумкин.

6-РЕЦЕПТ:

Тухум пўчоғи ҳам ошқозонда кислота ишлаб чиқарилишини меъёрлаштиради. Бунинг учун 1 дона қайнатилган тухум пўчоғини майдалаб толқонга айлантиринг ва ундан 0,5 чойқошиқ олиб, 1 стакан сув билан ичворинг. Агар сизни зарда қайнаши безовта қилаверса, бу усулдан тез-тез фойдаланиб туринг.

7-РЕЦЕПТ:

Зарда қайнаб бошлаши билан игир (қиёқсимон ўсимлик– аир) илдизини ювиб, тозалаб, чайнанг. Қанча майдалаб чайнасангиз, жиғилдон қайнашидан шунчалик тез озод бўласиз.

8-РЕЦЕПТ:

Газсиз минераль сув ҳам зарда қайнашини тўхтатади. Бунинг учун жиғилдон қайнаб, зарда қайта бошлаши билан ундан 1 стакан ичинг. Бундай сувни яхшиси, дорихонадан, шиша идишга қадоқланганидан олсангиз, янада тезроқ таъсир этади.