Хосият Рустамова

Кўкда булут сузади кўм-кўк,

Ерга осон сингийди овоз.

Сизда айб йўқ,

Менда гуноҳ йўқ —

Бу — Тангрининг фармони, холос.

Осмон турар бағрини очиб,

Замин пойингизда синади.

Кетиш мумкин — қаерга

қочиб —

Биз — ҳукмнинг ижрочилари.

Бу тоғларга сукунат чўккан,

Неча йилки оғрийди жони.

Жоним, нима ёғилар кўкдан? —

Бу фармон-ку —

Тангри фармони!..

Нега, ахир, йиғлайсиз зимдан,

Биз бахтлимиз...

Нима бор — ёшга?!

Сўз бераман — кечиб ўзимдан,

Сизни жондай эҳтиётлашга.