бу аёл ...

         Б У   -  А Ё Л . . .

(Ўзбек аёлларига байрам табриги)

Мунис ва мўътабар, ҳурки - бу аёл,

Покиза, ҳалолу, нурки – бу аёл!

Бебаҳо хазина, дурки – бу аёл,

Таърифу тавсиф йўқ, зўрки – бу аёл,

Олам гўзаллиги, кўрки – бу аёл!

Уларга қадалган минг битта орзу,

Баозор фаришта, ҳур, малак, оҳу,

Ҳаётнинг зийнати, мисоли кўзгу, 

Гар улар бўлмаса, олам қоронғу,

О и л а  таянчи, кўрки – бу аёл!   

Оллоҳим яратмиш аёл зотини,

Унга ҳадя айлаб ҳаёт отини!

Ҳаёт ширинлиги, лаззат – тотини,

қўйингки, дунёнинг бор бисотини,

Олам  гўзаллиги, кўрки – бу аёл!    

Энг аввал яралган Одам Атодур,

Сўнг жуфти ҳалоли Момо Ҳаводур!

Шу боис одамзот жуфт-жуфт ўтодур,

Ўзга нисбат бермоқ балки хатодур,

Башарнинг онаси, кўрки – бу аёл!    

қиз бўлиб туғилар, сўнг гўзал жонон,

Турмуш қургандан сўнг азиз онаҳон!

Бу асли мўъжиза, - ҳаммага  а ё н ,

Онасиз бўлмасди кенг олам – жаҳон,

Дунёнинг ҳуснию, кўрки – бу аёл!

Оналар меҳри – бу тоғлардан юксак,

Ҳеч қандай сўз етмас агар мақтасак!

Уларга борлиқни нисор айласак,

Севгилим, рафиқам, жонимсан,- десак,

Вафо, садоқатнинг кўрки – бу аёл!

 Болалар онанинг шўх жигарбанди,

 Хатто пайғамбар ҳам она дилбанди!

 Азиз, алиёлар  о н а  фарзанди,

 Шаҳаншоҳ, ҳонлар ҳам асали, қанди,

 Меҳру мушаббатнинг кўрки – бу аёл!

Онани улуғлар «Ҳадис»у «қуръон»,

Аёлни она дер кенг олам – жаҳон!

 Улуғлиги ортиқ, ортиқки чунон,

 Аёлни эъзозлар ҳар киши ҳар он,

 Шу ёруғ оламнинг кўрки – бу аёл!

Турмуш гўзаллигин она яратган,

Оламни ўзига айнан қаратган!

Фарзандин ниҳоят кўп эъзоз этган,

Эзгулик, мангулик гулин таратган,

Табиат кўзгуси, кўрки – бу а ё л !

Аёлни куйлади Мир Алишер ҳам,

Бобур шоҳ айлади ниҳоят кўркам!

Машраб жон бағишлаб, деди: «ушбу кам»,

Ошиқлар тиз чўкиб, дегайлар «Эркам!»

Севги, муҳаббатда зўрки – бу аёл!

Юзидан нур ёғар, хуршиду қамар,

Мадҳу сано ортиқ, юз миллион қадар!

Нозу карашмалар чунонки тортар,

Мақтовлар беҳисоб, юлдуздан ортар,

Башарнинг эркаси, кўрки – бу аёл!

Аёлнинг эрларга юксак меҳри бор,

Ишқи, муҳаббати, нозик сеҳри бор!

Аёллар олдида гўзаллик бекор,

Аёлсиз қолганнинг ҳоли кўп душвор,

Ҳаёт ширинлиги, кўрки – бу аёл!

Аёл бор – демакки, турмуш фаровон,

Аёл бор – демакки, уйлар чароғон!

Аёл бор – демакки, яшайди инсон,

Аёл бор - демакки, эрлар гиргиттон,

Оламнинг ҳуснию, кўрки – бу аёл!

Меҳрию тафти зўр ой ила кундан,

Табиат, мавжудот баҳр олар шундан!

Аёллар оламни қутқарар тундан,

Забардаст йигитлар қарздодир ундан,

Инсонлар эркаси, кўрки – бу аёл!

О н а  алласига гўдаклар қонар,

Куйласа, рақс этса,–жон ўртаб, ёнар!

Ханда айлаганда борлиқ тўлғонар,

Аёл жангга кирса, олам лол қолар,

Мўъжиза яратган, зўрки – бу аёл!

Ошиқлар айрилар нақди – нақдидан,

Баъзилар топдилар вафо аҳдидан!

Ширин деб воз кечди Фарҳод тахтидан,

қайс деб айрилди Лайло бахтидан,

Ишқ аҳлин гўзали, кўрки – бу аёл!

                        

Зебунисо, Нодира, Увайсий ўтди,

Уларнинг шуҳрати оламни тутди!

Озодлик, ҳурликни орзиқиб кутди,

Жабру жафо тортди, ғам-алам ютди,

Донолар доноси, кўрки – бу аёл!

                        Аёллар фаолдир ҳур жамиятда,

Уларнинг ўрни бор маънавиятда!

Ҳар кимга боқурлар самимиятда,

Кимга ёр бўлсам дер, яхши ниятда,

Жамият ҳуснию, кўрки – бу аёл!

Эрку ҳуқуқлари жуда юқори,

Улар жамиятнинг кўрк, ифтихори!

Эрларга рафиқа, севгили ёри,

Аммо дилларида кўпдир асрори,

Ҳур, озод замонда зўрки – бу аёл!

                          Давлат раҳбарлари – ҳокима аёл,

Муаллим, муҳандис, ҳакима аёл!

Илм фанда илғор, олима аёл,

Раққоса, шоира, ҳодима аёл,

Ақлу заковатда зўрки – бу аёл!

Таърифин ёзсам гар сиғмас бир шеърга,

У л а р  зебу зийнат шу она  е р г а !

Аммо жуда ҳам бой меҳру сеҳрга,

Вафодор, жафодор бўлурлар эрга,

Ҳаёт нашидаси, кўрки – бу аёл!

Аёллар йили – бу эмасдир бежиз,

Мадҳини куйладим адашмай ҳаргиз!

Аммо таърифлашга тил бўлди ожиз,

Мўътабар оналар -  аёл, гўзал қиз,

Шоирлар илҳоми, кўрки – бу аёл!

Ҳар она фарзандга якка, ягона,

Ҳар қитъа, ҳар юртда меҳрибон она!

Эрлар аёлларга бўлур парвона,

Ҳуру парилар шу, гўзал жонона,

Оламнинг ҳуснию, кўрки – бу аёл!

Аёллар – оналар абадий турсин,

Гўзал ёр, жонона бўлишиб юрсин!

Эъзоз ва шодликда давронлар сурсин,

Суҳайлий баҳр олиб, кўп умр кўрсин,

Таърифу тавсифда зўрки – бу аёл,

Оламнинг ҳуснию, кўрки – бу аёл!

               ------------------

               

                    СУҲАЙЛИЙ

            (Қоражон ҚОДИРОВ)  

                    Ўзбекистон