Хуршидабону

СЕНИ ЎЙЛАБ

Сара гулларни тердим меҳр ила эркам, сени ўйлаб,
Олов кўксимда зўр армон,  кўзимда нам, сени ўйлаб.

Улусдин ажрадим, оҳанрабодек ўзинга тортгач –
Дилим, ақлу ҳушим бесар – бўлолмас жам сени ўйлаб.


Муҳаббат боғидан чашми зилолинг ахтариб толдим,    
Умидим гулларин титраб  ўпар шабнам, сени ўйлаб.

Хаёлим сен-ла суҳбатдан кейин уйғонди ғафлатдан,
Эрир муз бу юрак  бирдан  мисоли  шам,  сени ўйлаб.

Наҳот қадр этмасанг тоғдай буюк, уммон қадар ишқим,
Ки  Хуршида  нетар меҳри  вафоинг  кам, сени ўйлаб.